easychina

Гуанжоу--2010

Elrond — Tue, 15 Dec 2009 16:16:55 GMT

Улиран одогч долоо хоногт өмнөд Хятадын Гуанжоу хотноо 2010 оны Азийн 16-р наадамд оролцох ҮОХ-дын элч төлөөлөгчид баруун этгээдээс зүүн хязгаар хүртлээ гурван бээрийн зайг туулах асар өргөн Ази тивийн өнцөг булан бүрээс таван одот "Гарден” (цэцгийн хүрээлэн) буурчийн газар руу довтолгон ирж, аяны тоосоо гөвж амжилгүй, ажил хуралдаа ханцуй шамлан оров. Нанхиад гүрэндээ "Цэцгийн хот” хэмээн алдаршсан Гуанжоугийн энэхүү тансаг буудалд ирэх жилийн Азийн Олимпийн хүндэт зочдын албан ёсны гэр нь (headquarter hotel) байх эрхэм үүргийг хүлээлгэсэн ажээ.

Жилийн дараа эхлэх Азийн Наадмын өмнөх бүх асуудлыг шүүн хэлэлцэх, газар дээр нь нягтлан судлах, дутуугаа нөхөж, дундуураа дүүргэх зорилготой энэ хуралд OCA-ийн гишүүн 45 орноос дайн дажинтай Афганистан, дарга-генерал нь таг болсон Ливаны ҮОХ-ны төлөөлөгчид ирцэндээ "тас” тавиулж, эгнээг маань ялимгүй цөөрүүлэв. Бүтэн 3 өдөр хуралдсан энэ үйл ажиллагааны үеэр олон шинэ саналуудыг тусган, онгоцоор буцаж байх агшинд чинь үтэр түргэн хариу өгнө хэмээн Гуанжоу-2010 хорооныхон ялдамхан амлах нь сайшаалтай

Азийн наадмын хөтөлбөрт 42 спортын төрөл багтсаны 28 нв олимпийн данстай, үлдсэн 14 нь тивийн ба бүс нутгийн шинжтэй. Үүнээс крикет, бүжгийн спорт, луут завь, дугуйт тэшүүр, хятад ба го даам анх удаа хөл тавьж буй "шинэ цэргүүд”. Нийт 45 орны 10000 гаруй авьяаслаг тамирчид нийт 473 цогц медалийн төлөө 2010 оны 11 сарын 12-27-ны өдрүүдэд 53 спортын цэнгэлдэх хүрээлэн, ордон танхимд өрсөлдөнө. Гуанжоугийнхан тамирчдын тосгоныг нэг шат ахиулан хэвлэл мэдээллийн ба шүүгчдийн байрны хамт 2,73 га газрыг эзэгнэх "Asian Games Town” буюу дагуул хот маягийн бүтээн байгуулалтыг хийж эхлээд байна. Наадмын дараа спортын бичил хорооллыг орон сууцны ашиглалтаар худалдаалах зар гарчээ. Өрөөний 1 м.кв-ийн үнэ 3700-10000 юаньд хүрэх шинжтэй.

Монголын түншүүд

Давид Ду, Софиа Лин гэдэг хоёр ажилтан Монголын асуудлыг хариуцан ажиллах болсон бөгөөд тэд Тав ба Зүүн Азийн хэлтэст харьяалагддаг ажээ. Мөн манай багийн туслахаар монгол хэлтэй хүмүүсийг судалж байгаа тухайгаа мэдэгдсэн юм.

Толигор зам, гялгар машин

Одоо энэ хотод Азийн наадмын бүтээн байгуулалт ид өрнөж, нийт ашиглах 53 байгууламжийг шинээр сүндэрлэх 9 цогцолборын хамт 2010 оны хаврын 3-р сараас зуны 6-р сарын хооронд чанарын өндөр түвшинд хүлээлгэн өгөх хатуу төлөвлөгөөтэй байгаа юм байна. Мөн байшин босгохын зэрэгцээ 43 авто зам, 8 түргэн галт тэрэгний шугам, 12 хурдны замаа шинээр тавих ба сайжруулан засварлахаа огт мартсангүй. Мөн наадмын үед үйлчлэх "төмөр хүлгүүд”-ийн нэрс тодорч "Toyota Camry”, "Honda Accord” нь тендерт "Buick”, "Hyundai”, "Benz”-ийг ялсан сурагтай.

Бамбар ба торго

Мөн Азийн наадмын бамбарт буухиан аяллыг ирэх жилийн 8-р сард эхлүүлж, эх орноороо аялуулах төлөвлөгөөг эцэслэхээр томилогдсон ажилтнууд толгой өндийлгэхгүй ажилласаар байна гэнэ. Харин Гуанжоу-2010 "Азийн Зам” хэмээх наадмыг дэмжих аялал OCA-ийн 37 орноор торгоны замаар мөрөө гарган, дурсгалаа үлдээжээ. Харин лалын шашныг үхширтэл баримтлагч Саудын Араб зэрэг орнууд уг үйл ажиллагааг дэмжээгүй бол дайн дажинтай зарим орон руу хятад нөхөд зүрхлэн ойртсонгүй.

Гуанжоуд очсон мэт цэнхэр дэлгэцийнхээ өмнө

Ази тивийн наадмыг алмайран үзэхийг хүсэгч спорт сонирхогчдод зориулж албан ёсны гэрээ байгуулсан 46 TV байгууллагынхан нь үүргээ биелүүлэх бэлтгэлдээ шамдан оржээ. Үүний жишгээр ABU (Asian Broadcastin Union)-ийн 8 гишүүн телевизтай монголын мэргэжилтнүүд ч цэнхэр дэлгэцээ байнга мялаах нь гарцаагүй биз ээ.

Сахиус – спорт ямаа

Азиййн наадмын бэлгэдэл сахиус нь 4 ишгээ дагуулсан Ямаа. Дээр үед их ган гачиг тохиосон цөвүүн цагт тэнгэрийн элч ямаа буун ирж, хур бороон хишгээ хайрлаж, ургац ногоог дэлгэрүүлж, улс ардыг зовлонгоос гэтэлгэсэн домгийг үндэслэн манай таван хошуу малын хамгийн сэргэлэн адтай энэ амьтныг Гуанжоу хот бэлгэдэн, хөшөө босгосон байдаг. Тэгвэл энэхүү үсэрч цовхчсон ямаа өдгөө Азийн наадмын маскотоор албан ёсоор тодорч, дөрвөн ишигний хамт анд нөхдөө урин дуудсаар байна. Бээжингийн олимпийн 5 эгдүүтэй амьтны жишгээр нэг хүн дээрхи тавлыг худалдан авах тул бас л сэргэлэн сэтгэж дээ. Монголд бол ноолуурын, "боодогны” гэсэн чиглэлээр ямаа арвин бол энд бэлчээр сүйтгэдэггүй "спорт ямаа” хэдэн саяар үржиж эхэллээ.

"VICS CLUB" гадаад оюутны party болно

Elrond — Tue, 15 Dec 2009 15:43:20 GMT

Бээжин хотын "VICS CLUB” –т 12 сарын 19-нд бээжин хотын гадаад оюутнуудад зориулсан Party болох гэж байна. Тус өдөр шөнийн 00-цагаас өмнө нэгийг авбал нэг үнэгүй журам мөрдөгдөх бөгөөд, VICS CLUB-т нэгдэх өдөр болгон гадаад оюутнуудад зориулагдсан орой байх бөгөөд карттай хүмүүст үнэгүй байх юм байна.

19-ний Party-д үнэгүй хүргэх үйлчилгээ явагдана

TAX: 50 юань

Хаяг: 北京市朝阳区工体北门内东侧 Gongti North Gate East side 北京

Жич: 19-ний өдөр сургуулийн үнэмлэхээ авчиран хүмүүст VICS-iin оюутаны карт нээлгэж болох ба тус картаар цаашдаа амралтын өдөрүүдэд хөнгөлөлт эдлэн TAX нь ердөө 30-юань болох гэнэ.

Хятадын Глобал Таймс сонин: Монголчууд Хятадуудад тийм ч таатай ханддаггүй

Elrond — Tue, 15 Dec 2009 14:41:07 GMT

Хятадын Глобал Таймс сонин

环球时报《蒙古人心态复杂看中国》

2009 оны 10 дугаар сарын 27
7 дугаар тал
Сэтгүүлч Лү Чан Ин

"Монголчууд Хятадад тийм ч таатай ханддаггүй”

Эдийн засгийн өсөлт хурдацтай байгаа ч ард түмний ойлголцол тааруу байсаар байна.

Монгол улсын нийслэл Улаанбаатар хотын хамгийн хөл хөдөлгөөнтэй газар болох Энхтайваны өргөн чөлөөгөөр алхаж байхдаа Орос үсгээс бүтсэн шинэ монгол үсгээр энд тэндгүй бичсэн эрээн мяраан хаягууд, гудамжны буланд байх Хятад загварын хуучин барилга зэрэг нь Хятад Орос хоёр том гүрний хооронд орших энэ улсыг бэлхэнээ тодорхойлоод өгөх шиг санагдлаа. Мөнхүү энэ бол Монгол улсын гадаад харилцааны олон талт бодлогын бас нэгэн илрэл болж буй мэт.
Монгол улс 1.5 сая хавтгай дөрвөлжин километр газар нутагтай. Энэ нь хэмжээгээрээ Оросын газар нутгийн 1/10 д хүрэхгүй. Хүн ам нь 2.7 сая. Энэ нь Хятадын хүн амын 0.2 хон хувьтай тэнцэнэ гэсэн үг. Газар нутгийн онцгой байршлаар хоёр том гүрний завсар хавчигдсан энэ улс хөрш орнуудаасаа сэрэмжилж болгоомжлох нь гарцаагүй юм. Ялангуяа Хятад улсаас, хэдийгээр хоёр орны эдийн засгийн харилцаа улам бүр өргөжин тэлж, хятад хүмүүс монголд байх гадаад иргэдийн дийлэнх хувийг эзэлж байгаа гэх боловч хоёр орны ард түмний харилцаа, ойлголцол эдийн засгийн хөгжлийн хурдыг гүйцэх нь битгий хэл дөхөж очихгүй байна. Тиймдээ ч хятадаас сэрэмжлэх, хятад хүнийг сэрдэх үзэл монголын хаанаас ч үнэртэж болохоор. Энэ нь хэдийгээр түүхийн шалтгаантай гэх боловч, монголд ажиллаж амьдрах хятад хүмүүсийн гаргаж байгаа зохисгүй авиртай илүүтэй холбоотой юм. Мөн энд улс төрийн хийгээд олон улсын орчин нөхцөл байдалзэргийн нөлөөлөл ч мэдээж бий. Зарим монгол хүн хятадын төрийн далбаан дээр 5 таван хошууг ийнхүү тайлбарлах юм. "Нэг том таван хошуу нь Хятад улсыг төлөөлөх ба, үлдсэн дөрөв нь Хонг Гонг, Макао, Тайвань болон Монголыг төлөөлж байгаа гэнэ. Хятад Тайванийг хэзээ нэг өдөр буцааж авна. харин түүний дараа хараагаа Монголруу чиглүүлэнэ. " Тэдний энэ тайлбараас Монголчууд Хятадад хандах хандлага тийм ч сайнгүй гэдгийг мэдэж болохоор байна.

Хятад Монголын худалдааны эргэлт сүүлийн 18 жилд 82 дахин өссөн.

Шөнө дунд, Бээжингээс Улаанбаатар орох Олон улсын суудлын галт тэрэг Эрээн хотоос хөдөллөө. 10 хэдэн минутын дараа Монголын Замын-Үүд боомт хотод ирлээ. Эрээн хот бол Хятад Монголын хил дээрх байнгын ажиллагаатай хамгийн том боомт бөгөөд автозам, төмөр замтай цорын ганц боомт хот юм. Их говийн дундах Хятад Монголын хилээр Улаанбаатар руу явах галт тэрэг болон машинууд зэрэгцэлдэн умарыг чиглэн хөдөлнө. Монголын өмнө хойд тэнхлэг дагуух энэ төмөр зам бол тус улсдаа цорын ганц. Галт тэргэнд нааш цааш худалдаа хийх наймаачид ихэвчлэн суух бөгөөд өдөр тутмын өргөн хэрэглээний бараа, гурил будаа, барилгын материал зэрэг ачаа барааг тээвэрлэх юм. Монголын хилээр орохдоо галт тэрэг дугуйгаа заавал монголын төмөр замд тохирсон өргөн дугуйгаар солино. Монголоос Хятадруу ирэх галт тэрэг эрдэс баялаг, мал аж ахуйн түүхий эд, бараа бүтээгдэхүүн зэрэг монголын бараа тээвэрлэдэг.
Шөнийн Замын-Үүд боомтыг ажихад, Хятадын хойд нутгийн жирийн л жижиг зогсоол мэт ажээ. "Галт тэрэгний зогсоол бол Замын-Үүдийн хамгийн сайхан барилгатай газар. Өнгөрсөн зууны 80 аад онд, Замын-Үүд манай Эрээн хотоос илүү хөгжилтэй байсан. Гэвч одоо Эрээнээс хөгжлөөрөө бараг 40, 50 жилээр хоцорч яваа юм шиг болсон. " гэж Эрээн хотын нэгэн оршин суугч надад хэлсэн юм. Хэдийгээр Монгол улс гадаад шинэтгэлийн нээлттэй бодолго явуулаад 20 жил өнгөрч байгаа ч эндэхийн дэд бүтцийн хөгжил Хятадтай харьцуулахааргүй хоцорж яваа юм. Тэр битгий хэл нийслэл Улаанбаатар хотын өнөөгийн өнгө төрх эгээ л өнгөрсөн зууны 80,90 -ээд оны үеийн Хятадын хойд нутгийн хот шиг байх юм.
"Монголчууд өдөр тутмын өргөн хэрэглээний бараа, өмсөж зүүх гутал хувцас,барилгын материал гээд хэрэглээнийхээ 80 хувийг Эрээн боомтоор дамжуулан Хятадаас импортлодог. " гэж Эрээн хотын худалдааны газрын орлогч дарга Лю Жи Мин Глобал Таймсын сэтгүүлчдэд хэлсэн юм. 2008 онд, Хятад улс 10 дахь жилдээ Монголын хамгийн том худалдааны түнш орон болсон юм. 1990 онд, Хятад Монголын худалдааны эргэлтийн хэмжээ 33.6 сая доллор байсан бол 2008 онд энэ тоо 82 дахин өсч, 2.8 миллярд доллорт хүрсэн юм. Өнөөдөр Монгол улс экспортын нийт бараа бүтээгдэхүүнийхээ 60 -аас илүү хувийг Хятад руу гаргаж байна. Монголын импортын нийт бараа бүтээгдэхүүний 1/3 хувийг хятадын бараа бүтээгдэхүүн эзэлж байна. Хөрөнгө оруулалтын салбарт ч хятадын хөрөнгө оруулагчид дээгүүрт тооцогдож байгаа юм. 2008 онд давхардсан тоогоор 800 000 монгол иргэн бизнес хурал зөвөлгөөн, аялал жуучлал, амралт зугаалга, сургууль, эмчилгээнд хамрагдах зэрэг зорилгоор хятадад айлчилсан мэдээ байна. Одоогоор хятадын их дээд сургуулиудад 2300 монгол оюутан суралцаж байна. Хятад монголын эдийн засгийн харилцаа өргөжин хөгжиж байгааг дагаад монгол улсад хятад хэл сурах сезон эхлээд байгаа бөгөөд, Улаанбаатар хотод 40 гаруй бага дунд сургууь хятад хэлний тусгай анги нээж, бүр амралтын өдрүүдэд ч хятад хэлний сургалтууд явуулж байна.
Өнөөдөр Монголд ажиллаж амьдарч буй гадаадын иргэдийн дийлэнх нь хятад иргэд хэдий ч монгол хүмүүс хятад хүмүүст тийм ч таатай хандахгүй байгаа нь нууц биш. Сэтгүүлч намайг Улаанбаатарт хөл тавиад удаагүй байхад тэндхийн цагаач иргэн : "гадуур явж байхад чинь хүмүүс чамайг харааж загнавал юу ч сонсоогүй мэт өнгөрөөрэй. Болж өгвөл хятадаар битгий яриарай. Ядаж л гудамжны архичид зүгээр явуулахгүй шүү” гэж аминчлан захисан юм. Монголд байх 7 хоногийн хугацаанд энэ айдастай аюултай мэдрэмж надаас огт салаагүй. Үнэндээ хятад хүн гудамжинд зүгээр явж байгаад монголчуудад ямар ч шалтгаангүй дээрэлхүүлж, доромжлуулах нь хэвийн үзэгдэл ажээ. Тиймдээ ч энд хятад иргэдтэй холбоотой хэргүүд жил бүр хэдэн арваараа гардаг гэнэ. Америкийн Таймс сэтгүүл 2009 оны 7 дугаар сарын дугаартаа Монголын "Шинэ Нацистууд” Хятад иргэдийг дарамталж байгаа тухай тусгай нийтлэл хэвлүүлж байсан. Зарим монгол хүн Хятад хүмүүсийг дайсан мэт үздэг нь монголд бол тийм ч шинэ сонин зүйл биш ээ. Монгол Улсын Шинжлэх ухааны Академийн Олон улсын судлалын хүрээлэнгийн орлогч дарга Шүрхүү энэ тухай хэлэхдээ: "Өнгөрсөн 200 жилийн турш, Монголчууд Манж Чин улсыг эзлэн түрэмгийлэгч хэмээн үзсээр ирсэн учир Хятадад өстэй ханддаг нь үүнтэй холбоотой.” гэлээ.

Улаанбаатарын гудамжнаас "Хятад”-ын ул мөрийг хайх нь

Улаанбаатар хот бол гурван талаараа уулсаар хүрээлэгдсэн, үзэсгэлэнт Туул голоор урд энгэрээ чимсэн хот. Монголын нийт 2.7 сая хүн амын 1 сая гаруй нь энд сууршин амьдардаг. Улаанбаатарын гудамжаар салхилж явахдаа энэ хотоос Зөвлөлт Оросын хэв маяг өнгө төрх бага багаар сарнин холдож байгааг анзаарсан юм. Гудамжны энд тэнд өлгөөтэй байх хаяг самбар дээрх орос үсэг дээр сууриласан шинэ монгол бичиг болон хуучны орос загварын барилгаас өөр Зөвлөлт Оросын ул мөр гэхээр зүйл олж харсангүй. Харин нарийн сайн ажиглах юм бол энэ хотоос Хятадын гэхээр ул мөрийг олж болох юм. "Энхтайваны гүүр” Улаанбаатар хотын цорын ганц босоо шугаман гүүр. Үүнийг 1950 аад оны үед хятадын тусламжаар барьж байгуулсан юм. Мөн "Улсын Их Дэлгүүр”-ийн барилгыг ч Бээжин хотын Ван Фү Жин худалдааны гудамжны их дэлгүүрийн барилгын загварыг хуулбарлан байгуулсан. "Богд Хааны Ордон Музей” ордны хаалганаас авхуулаад доторх барилгууд нь бүгд хятад загварынх, бас хаалганы нүүрэн дээр хятадын уламжлалт зоос болон бумбаны зураг сийлээстэй байдаг.
"Шинэ Хятад улс байгуулагдсаны дараа, Социолизмыг бүтээн байгуулж байсан улсуудын хувьд, хоёр орны харилцаа аажмаар сайжирч, хятадын тусламж ч монгол улсад их хэмжээгээр орж ирж байсан. Тэр үеийн байдлыг бид "Монгол улс тухайн үедээ Зөвлөлт Орос, Хятад гэсэн хоёр ахтай байжээ ” гэж зүйрлэн ярьцгаадаг. Гэвч 1960 аад оны үед Зөвлөлт Орос болон Хятадын харилцаа муудаж, улмаар Монгол улс Зөвлөлттэй харилцаагаа зузаатгаснаар, Хятад дахь харилцаагаа муутгасан. Үүнийг дагаад хоёр орны ард түмний харилцаа ч царцаж эхэлсэн юм.” Монгол дахь Хятадын цагаач иргэдийн холбооны дарга Бай Шуан Жань энэ түүхэн цаг үеийг биеэрээ мэдэрсэн хүн юм. 1959 онд наймхан сартай байхдаа эцэг эхийн хамт Монголд цагаачлан ирж байсан Бай Шуан Жань хэдийнээ 50 жилийг энэ газар нутагт элээжээ. "Тэр үед монгол сургуулиуд хятад хүүхдийг авдаггүй байснаас бид багадаа зөвхөн цагаачдын сургуульд сурдаг байлаа. Гэтэл тухайн үеийн монголын засгийн газар хятад цагаачдын сургууль төгсөгчдөд бүрэн дунд боловсролын гэрчилгээ олгодоггүй байсан. Ингээд их сургуульд орох ямар ч боломжгүй бид барилгын талбай дээр хар ажилчин болж, амьдрал ахуйгаа залгуулдаг байлаа. Хэдийгээр тэр үеийн монголд хятад цагаачдын амьдрал хүнд хэцүү байсан ч хятадтай харьцуулахад идэж уух, өмсөж зүүх дутдаггүй байсан. Бид бас элсэн чихэр, гурил будаа худалдан авч хятадад дахь хамаатан садан руугаа явуулж болдог байсан. Тиймээс байдал хүнд байсан ч олон хятад иргэн монголд ирж суурьших болсон юм. Монголд хятад иргэд хамгийн олондоо 10000 хүн байсан. Дараа нь 1983 онд Хятад иргэдийг хөөж, заримыг хөдөө сумд руу, заримыг хятад руу албадан буцаасан. Ингээд 1 жилийн дараа гэхэд ердөө 1700 хятад иргэд үлдсэн байсан. ” гэж Бай Шуан Жань сэтгүүлчид ярьсан юм.

1990 оноос эхлэн монголыг чиглэх хятад иргэдийн цуваа дахин эхэлсэн ажээ. Монголд амьдардаг нэгэн хятад иргэн сэтгүүлчид ярихдаа: "Тэр үед Эрээнээс Улаанбаатар руу явах суудлын галт тэрэгний билет хамгийн хямддаа л 200-300 юань байсан. Бидний зарим нь 500 юань өвөртөлж гараад Улаанбаатар орж нэг тойрчихоод ирдэг байлаа. ” гэж дурссан юм. Хятад наймаачид үнэ хямдтай зүйл зүлийн эрээн мяраан бараа таваарыг Монгол руу гаргаж, тухайн үеийн зах хоршоодод амь нэмж байсан. Гэсэн хэдий ч чанар муутай хуурамч бараа их байсан гэдэг. "Зах зээлд шилжсний дараа олон хятад наймаачид хямд үнэтэй чанаргүй жижиг бараа зарж баяжиж байсан" гэж хятад монголын хооронд олон жил наймаа хийсэн хятад иргэн ярилаа.
Одоо хятадын том хотуудтай харьцуулбал монголын хүн амын дундаж орлого тийм их биш, амьдралын өртөг ч өндөр биш. Өргөн хэрэглээний хүсний бүтээгдэхүүнээс жимс, ногоо хамгийн үнэтэй бөгөөд импортын алим хил нь 6,7 юань орчим үнэтэй. Харин хонь үхрийн мах маш хямд, 100-200 юаньд нэг бүтэн хонины мах авч болно. "Монголд уурхайчдын сарын цалин 1000 юань орчим байдаг” гэж Монголд уул уурхайн үйл ажиллагаа эрхэлдэг нэгэн хятад бизнесмэн надад ярьсан бөгөөд энэ нь монголд цалингийн дундаж хэмжээ бололтой.
Улаанбаатарт орлого багатай, амьдрал тааруу хүмүүс хотын захын дүүрэгт байх гэрийн хороололд амьдардаг. Тэд банзаар хашаа барьж, хашааныхаа аль нэг буланд гэрээ барин суудаг. Амьдралын түвшин дундаж гайгүй хэсэг нь хотын төвөөр орон сууцанд амьдардаг. Хятадын монгол дахь хөрөнгө оруулагчдын "Хятадын бизнес худалдааны нийгэмлэг”-ийн барилга, барилгын материалын салбарын дарга Чэнь Жиэн Хуа сэтгүүлчид ярихдаа: "Улаанбаатарын газар сайгүй барилгажилт явагдаж байна. Барилгын салбарт ажиллаж байгаа дийлэнх хөрөнгө оруулагчид Хятадын бизнес эрхлэгчид юм. Мөн барилгын ажилчдын дийлэнх нь хятадаас оруулж ирсэн ажиллах хүчнүүд.Зөвхөн өнгөрсөн жилийн байдлаар гэхэд 30000 хятад ажилчид монголд барилга барихаар орж ирсэн байна.Гэхдээ монголын гадаадын ажиллах хүчинд тавих хязгаарлалт болон холбогдох хууль дүрэм маш хатуу чанга байдаг учир нэг хэсэг хятад ажилчид "Хар”-аар ажилладаг юм. ” гэлээ.

Монгол улс эдийн засгийн аюулгүй байдалдаа санаа зовниж байна.

Өнөөдөр хятадын бизнесменүүд монголд жижиг ахуйн бараа таваарын наймаас эхлээд барилга, уул уурхайн салбарт хүчээ сорьж байна. Хятадын бизнесменүүдийн үйл ажиллагаа газар авч, монгол дахь худалдааны харилцаа сайжрах тусам монголчуудын зовнил, сэрэмж улам бүр нэмэгдэн байна. Монголчууд өөрийн удам судар, цус генийн цэвэр байдлаа маш их анхаарч дээдэлдэг хүмүүс. Тиймээс монгол эмэгтэйчүүдийг харийн хүнтэй гэр бүл болоход маш их дургүйлхэхдэг. Гэтэл хятад залуучууд монголд очоод монгол эмэгтэйчүүдтэй хайр сэтгэлтэй болох, бүр гэр бүл болох нь цөөнгүй. Мэдээж зарим нь биеэ үнэлэгчтэй орооцолдох, эсвэл охидуудыг ивээн тэтгэх гэх мэтийн ёс бус үйлдэл ч зарим нь хийж байгаа байх. "Нэг монгол охин хятад залуутай хамт амьдарч байгаад түүнээсээ болоод үсээ хусуулсан гэнэ лээ” гэж нэг монгол хүн надад хэлсэн юм. Үнэндээ монголчуудын энэ хандлагыг ойлгох тийм хэцүү биш. 2.7 сая хүн амтай энэ улсын хувьд гададын цагаачид ихээр орж ирэх эсвэл олон монгол иргэн гадаад хүнтэй гэр бүл болох нь үндэсний аюулгүй байдал хийгээд цусны цэвэр байдалд сөрөг нөлөөлөх нь тодорхой. Намайг сурвалжлага хийгээд явж байхад нэгэн эмэгтэй надаас : "Танай хятад хүмүүсийн олонх нь монголыг хятадын нэг хэсэг гэж үзсэн хэвээрээ юү? ” гэж асуусан юм. Энэ тухай Д.Шүрхүү хэлэхдээ, "Монгол хятадын улс төрийн харилцаа яаж ч сайжирсан монголын ард түмний энэ сэрдэлт, зовнил тийм амархан арилахгүй” гэлээ.
Зах зээлийн эдийн засгийн хөгжил, хятад монголын худалдааны харилцаа өдрөөс өдөрт сайжирч байгаа нь монголчуудын энэ зовнилыг эдийн засгийн аюулгүй байдал руугаа хандуулахад хүргэж байна. "Социолизмын он жилүүдэд Зөвлөлт Орос манай байгалийн баялагаас их цөлмөсөн. Чухамдаа одоо бол бүр олон орон манай улсад ашигт малтмалын хайгуул, ашиглалт хийж байна. Монголчууд энэ байдалд яаж хандах ёстой вэ? Мэдээж юуны түрүүнд өмнөх туршлагаасаа сургамж авч нэг талт биш олон талт хамтын ажиллагаа өрнүүлэх ёстой. ” гэж Д.Шүрхүү хэлсэн юм. Бүх талын харилцаа хамтын ажиллагаагаа зөвхөн хоёр хөршөөрөө хязгаарлахгүйн тулд монгол сүүлийн жилүүдэд "Гуравдагч хөрш” гэсэн үзэл гаргах болж, энэ үзлийн дор газар зүйн хил хязгаарыг давж, Америкийг "Гуравдагч хөрш”-өөр зарлаж, Япон, Солонгос, Канад болон Европын орнуудтай идэвхитэй нягт хамтран ажиллах болсон. Түүнээс гадна Монголын газарзүйн онцгой байршил нь ч олон улсын анхаарлыг эрхгүй татах болсон юм. Сүүлийн хэдэн жил Америк, Орос, Катар, Солонгос зэрэг олон улс орон Монголд цэргийн хамтарсан хээрийн сургалт зохион байгуулах болж, дэлхийн улсууд болон олон улсын байгууллагууд монголд эдийн засгийн тусламж дэмжлэг илүү ихээр үзүүлэх болсон.
Хэдийгээр Монгол улс Америкийг "Гуравдагч хөрш”-өө хэмээн зарласан боловч ардын амьдрал дунд Америкийн гэхээр зүйл бараг байхгүй. Харин Япон, Солонгосын нөлөө Монголд илүү мэдэгдэхүйц мэтээ. Ажил эхлэх тарах оргил цагуудад Улаанбаатарын замуудаар түгжилдэх машинууд цөм л Япон юмуу Солонгосынх. Ер нь Япон бол Монголын хамгийн том хандивлагч улс юм. Монголын ноос ноолууран бүтээгдэхүүний алдарт "Говь” үйлдвэрийг тэртээх 1970 аад оны үед Японы буцалтгүй тусламжаар барьсан түүхтэй. Өдгөө Япон улс Монгол улсад жил бүр буцалтгүй тусламж олгоод зогсохгүй, байгаль орчны олон арван төсөл хэрэгжүүлж байгаа юм. Япончууд гурил, будаа, өдөр тутмын хэрэглээний бараа зэрэг маш хүмүүнлэг тусламжийн бараа Монголд нийлүүлэх юм. Бас болоогүй, тусламжийн бараа болгоны дээр Япон Монголын найрамдал гэсэн шошготой. Монголын алдарт Сумоч Асашёрү Японд маш нэр хүндтэй нэгэн тул Японы Сумо монголд нэгэнтээ маш олон хүний талархлыг хүлээсэн спорт болж чадэээ. Түүнээс гадна олон арван мянган монгол залуу Солонгост ажилладаг бөгөөд жилд тэдний эх орон элгэн саданруугаа гуйвуулдаг мөнгөн дүн хэдийнээ хэдэн зуун сая доллороор хэмжигддэг юм. Тиймээс Монголчууд Солонгос улсад элэгтэй. Монголын ардын хувьсгалын дурсгалын цогцолбороос холгүйхэн том хэмжээтэы алтан бурхан сүндэрлэх бөгөөд түүнийг мөн Солонгосууд барьж өгсөн ажээ.

Монголын уул уурхай, орд газрын ашиглалтын дээр Хятад улс Баруунаас хоцорч байна.

Хэдийгээр Монгол улс гадаад харилцааны олон талт бодлого хэрэгжүүлж байна гэх боловч эдийн засгийн жинхэнэ бодот хөгжлийг олохыг тулд Хятадтай хамтрах ёстой гэдгийг Монголчууд сайн мэднэ. Газар зүйн байршлаас шалтгаалан Монгол улс уул уурхайн эрдэс баялагаа нэг бол Орос руу эс бөгөөс Хятад руу л гаргах хоёр замтай. Орос өөрөө байгалийн эрдэс баялаг ихтэй, түүнийгээ гадаадад гаргах гарц ч олонтой учир Монголын байгалийн баялагийг ашиглах хэрэгцээ тийм их биш. Тиймээс Монголд ямар улсын ямар компани үйл ажиллагаа явуулж, олборлолт хийлээ ч эцсийн хэрэглэгч нь яахын аргагүй Хятад болж таарч байгаа юм.
Монголын уул уурхайн олборлолт ашиглалтын салбарт үйл ажиллагаа явуулж буй Хятадын компаниуд тоогоор олон байгаа ч Орос, Канад, Австралийн компаниуд шиг нөлөө бүхий байж чадахгүй байна. "Монголд химийн ховор элемент болох Ураны баялагийн нөөц асар их. Одоогоор Ураны олборлолт, ашиглалтын лиценз Оросын компаниудын гарт байна. Хятад Монголын хилийн зурвасаас 80 километрт орших алт зэсийн орд Оюутолгой өдгөө ашиглагдаагүй байгаа дэлхийн цөөн том ордуудын нэгд тооцогдож байна. Энэ жилийн 10 дугаар сарын 6 нд Монголын засгийн газар Канадын Айвенхоу Майнз болон Австралийн Рио Тинго компаниудтай тохиролцоонд хүрч, олборлолтын гэрээнд албан ёсоор гарын үсэг зурлаа. ” гэж монголд уул уурхайн чиглэлийн үйл ажиллагаа явуулдаг нэгэн хятад бизнесмен хэлээд тэрээр мөн цааш нь: "Монголын уул уурхайн салбар дөнгөж хөгжиж эхэлж байна. Бид оройтойгүй байгаа ч, бас олборлож байгаа маань бага байна. Азийн хамгийн том зэсийн орд болох Эрдэнэтээр жишээ авахад, энэ орд цагтаа Монголын эдийн засгийн 1/3 –ийг дангаар үүрч явсан. Түүний нийт зэсийн хүдэрийн 90-ээс илүү хувь нь Хятад руу экспортлогдсон тоо байдаг. Хэдий ийм ч өнөөдрийг хүртэл нэг ч Хятад компани монголын талтай томоохон ордуудын ашиглалт дээр хамтын гэрээг хийгээгүй л байна. ” гэж ярьсан юм.
Д.Шүрхүү хэлэхдээ, "Гадаадын компаниудын үйл ажиллагаа монголд нийгмийн олон сөрөг асуудлуудыг бий болгож байгаа. Тухайлбал, зарим компани орд ашиглах лиценз хуурамчаар үйлдэх, олборлолт хийсэн газраа байгалийн нөхөн сэргээлт хийлгүй, байгаль орчин сүйтгэх гэх мэт. Монголын уул уурхайн салбарын тухайд гэвэл дөнгөж л хөлд орох гээд мөлхөж буй хүүхэд мэт нялх байна. ”
"Монголд дэвшилтэт технологи, шилдэг менежмент хэрэгтэй. Гэвч энэ тал дээр Хятад уул уурхайн компаниуд Барууныг гүйцэх болоогүй байна.”

Саньмэний цөмийн цахилгаан станцын 2-р цогцолборыг байгуулж байна

Elrond — Tue, 15 Dec 2009 14:01:55 GMT

Синьхуа хорооны мэдээлснээс үзвэл, Хятадын дорнод хэсгийн Жэжян мужийн Саньмэний цөмийн цахилгаан станцын 2-р цогцолборын цөмийн арлыг 15-ны өдрөөс албан ёсоор байгуулж эхлэв.

Тус цөмийн цахилгаан станцын 1-р цогцолборыг энэ оны 4-р сараас эхлэн байгуулж байгаа бөгөөд 2-р цогцолбортойгоо 2013 , 2014 онд тус тус ашиглалтад шилжих юм.

11-р сарын сүүлчийн байдлаар Хятадад ашиглалт орсон цөмийн цахилгаан станцын урвалын зуух 11 болж дэлхийд хамгийн их цөмийн цахилгаан станц байгуулж буй орон болсон байна.

Дарга Хү Жинтаогийн Дунд Азид хийсэн айлчлал их үр дүнд хүрчээ

Elrond — Tue, 15 Dec 2009 13:51:30 GMT

Энэ сарын 12-14-ны өдрүүдэд Хятад улсын дарга Хү Жиньтао Казахстан болон Туркменстанд ажлын айлчлал хийсэн байна. Энэ айлчлал дуусан үеэр дарга Хү Жиньтао-д бараа болж айлчилсан Хятадын ГХЯ-ны сайд Ян Жечи дагаж явсан сэтгүүлчдэд хандан хэлэхдээ, дарга Хү Жиньтаогийн энэ удааны айлчлал нь Хятад болон холбогдох орны уламжлалт найрамдал болон харилцан ашигтай хамтын ажиллагааг гүнзгийрүүлж, айлчлал нь элбэг баялаг амжилтад хүрсэн байна гэжээ.

Ян Жечи хэлэхдээ, дарга Хү Жиньтаогийн Казахстанд хийсэн айлчлал нь хоёр орны стратегийн түншийн харилцааны хөгжлийн шинэ ахицыг түлхэн ахиулсан байна. Казахстанд айлчлах хугацаанд, дарга Хү Жиньтао улс төрийн итгэлцлийг нэмэгдүүлэх, эрчим хүчний салбарын хамтын ажиллагааг гүнзгийрүүлэх, эх баялгийн бус салбарын хамтын ажиллагааг түлхэн ахиулах, банк санхүүгийн салбарын хамтын ажиллагааг эрчимжүүлэх мөн тэрчлэн хүмүүнлэгийн салбарын хамтын ажиллагааг өргөтгөх таван санал дэвшүүлсэн байна. Хятад Казахстан хоёр орны удирдагч хоср орны олон салбарын ажилч хэрэгч хамтын ажиллагааг эрчимжүүлэх, Шанхайн хамтын ажиллагааны байгууллага зэрэг байгууллагын хамтын ажиллагааг эрчимжүүлэх, Хятад Казахстаны сайн хөршийн найрсаг харилцааг түлхэн ахиулах, харилцан итгэлцсэн стратегийн түншийн харилцааг тасралтгүй хөгжүүлэх тухай санал нэгдсэн байна. Дарга Хү Жиньтаогийн энэ удааны айлчлал нь Хятад Казахстаны эх баялгийн бус салбарын хамтын ажиллагааг түлхэн ахиулах талаар шинэ үр дүнд хүрсэн бөгөөд Хятад Казахстаны соёлын солилцоог түлхэн ахиулах, хоёр орны ард түмний ойлголцоо болон найрамдлыг гүнзгийрүүлэх талаар чухал нөлөө үзүүлсэн байна гэжээ.

Ян Жечи хэлэхдээ, дарга Хү Жиньтаогийн Туркменстанд хийсэн айлчлал нь Хятад Туркменстан хоёр орны олон салбарын ажилч хэрэгч хамтын ажиллагааг гүнзгийрүүлж хөгжүүлсэн байна. Айлчлалын хугацаанд, дарга Хү Жиньтао Хятад Туркменстаны хамтын ажиллагааны комиссын механизмыг эхлүүлэх, хоёр орны эрчим хүчний хамтын ажиллагааг гүнзгийрүүлэх, зам харилцаа, холбоо, дэд бүтцийн бүтээн байгуулалт зэрэг эх баялгийн бус салбарын хамтын ажиллагааг эрчимжүүлэх, хоёр талын тохиролцсон зээлийн төслийг хэрэгжүүлэхийг багтаасан Хятад Туркменстаны ажилч хэрэгч хамтын ажиллагааг эрчимжүүлэх 4 зүйлт санал дэвшүүлсэн байна. Хоёр тал бас хүмүүнлэгийн салбарын хамтын ажиллагааг өргөтгөх, хэвлэл мэдээлэл, эрдэм шинжилгээний байгууллага хоорондын харилцаа холбоог нааштай түлхэн ахиулах, хоёр орны найрамдлын үндэс суурийг бэхжүүлж, хоёр талын олон салбарын хамтын ажиллагааг түлхэн ахиулах тухай хоёр тал санал нэгдсэн байна.

Туркменстанд айлчлах хугацаанд, дарга Хү Жиньтао бас Туркменстан, Казахстан, Узбекистан гурван орны ерөнхийлөгчтэй хамт Туркменстаны Аму голын эрэгд болсон Хятад-Дунд Азийн байгалийн хийн хоолойг дамжуулах ёслолд оролцсон байна. Үүний тухай Ян Жечи хэлэхдээ, энэ төсөл бол дөрвөн орны харилцан ашигтай хамтын ажиллагааны үлгэр жишээ болох юм, энэ нь дөрвөн орны бүс нутгийн эдийн засгийн хамтын ажиллагааг эрчимжүүлэх, хамтаар хөгжихийг биелүүлэх хамтын хүсэл эрмэлзлийг харуулсан байна гэжээ.

Туркместанд айлчлах хугацаанд, дарга Хү Жиньтао бас байгалийн хийн хоолой дамжуулах ёслолд оролцхоор ирсэн Узбекистаны ерөнхийлөгч Ислам Каримовтой уулзсан байна. Хятад Узбекистаны харилцааг тасралтгүй хөгжүүлэхийг хоёр тал санал нэгтэй хүлээн зөвшөөрчээ.

Дарга Хү Жиньтаогийн энэ удааны айлчлал нь Хятад болон Дунд Азийн орнууд хоорондын харилцааг улмаар түлхэн ахиулж, бүс нутгийн энх тайван болон тогтвортой байдал болон цэцэглэлт хөгжлийг түлхэн ахиулахад чухал бөгөөд гүн гүнзгий нөлөө үзүүлэх болно гэж Ян Жечи бас цохон тэмдэглэжээ.

3-н орны бүс нутагийн чанартай хамтын ажиллагааны дээд уулзалт эрээн хотод боллоо

Elrond — Tue, 15 Dec 2009 13:43:46 GMT

Монгол Хятад, Орос, 3 орны бүс нутгийн чанартай хамтын ажиллагааны дээд уулзалт-Эрээний эдийн засаг худалдааны анхдугаар чуулган 15-ны өдөр Хятадын хойд хилийн Эрээн хотод боллоо.

Одоо Хятадын Тяньжинь-Эрээн-Улаанбаатар-Иркутскийн төмөр зам, авто зам болон усан боомтоор гол тэнхлэг болгосон бүс нутгийн хамтын ажиллагааны зам шугамыг байгуулсан нь замын дагуух хот болон бүс нутгийн гол анхаарах асуудал болоод байна.

3 орны засгийн газар, аж ахуйн нэгж, нийгэмлэг зэрэг байгууллагаас хүрэлцэн ирсэн 300 орчим төлөөлөгч уг уулзалтад оролцож, "Зам гүүрийн эдийн засгийг хөгжүүлж, хамтын ажиллагааны хонгил байгуулах" сэдвээр ярилцсан байна.

ОХУ, Монгол улс нь тус тус Өвөр Монголын 1 болон 2 дахь гадаад худалдааны том түнш болсон бөгөөд гадаад дахь барилгын гэрээний болон хөдөлмөрлөх хүч экспортлогч гол орнууд болсон. 2008 онд, Өвөр Монголын Орос, Монголтой хийсэн худалдааны нийт хэмжээ тус тус 3 тэрбум 100 сая ам.доллар болон 2 тэрбум ам.доллараас давсан байна.

Хичээл давтах газараа хэрхэн сонгох вэ?

Elrond — Sat, 12 Dec 2009 02:49:57 GMT

Хичээл номоо үр дүнтэй давтаж чанартай сурахын тулд хичээллэх газраа зөв сонгож, тав тухтай орчныг бүрдүүлж чадсанаар сурах хүсэл эрмэлзэл нэмэгдэж, улам идэвхтэй суралцана гэсэн үг юм. Иймд бид энэ удаад хичээл давтах газраа хэрхэн зөв сонгох талаар дараах зөвлөгөөг бэлтгэлээ.

□   Суралцах таатай орчин нь байнгын бэлэн олоход хялбар тийм газар байвал зүгээр. Хэрвээ суралцах газар тань ихэнхдээ хүнээр дүүрэн зайгүй байдаг бол өөр газар олох хэрэгтэй.
□   Уг газар нь таныг үймүүлэгчдээс хамгаалсан газар байх ёстойг анхаараарай. Идэвхтэй хичээл давтах хугацаанд хий дэмий ойр зуур юм яригсад гэх мэтийн үймүүлэгчид саад болдогийг хэлэхэд илүүдэхгүй.
□   Хэт уйтгартай эсвэл үймээн шуугиантай газар суралцана гэдэг таны суралцах идэвхийг бууруулна.
□   Боломжтой бол таны ном, дэвтэр үзэг харандаа, ер нь хэрэглэж байгаа бүхий л зүйл тань багтах өргөн цэлгэр ширээтэй орчин байвал та ая тухтай суралцахад таатай нөлөө үзүүлэх болно.
□   Мөн хичээллэхээр суухдаа танд хэрэг болох бүхий л хэрэгсэлээ нэг дор авахаа мартуузай. Эс бөгөөс, та эдгээр зүйлсээ авахаар босох болгондоо сурах идэвхээсээ саармагжуулж байна гэсэн үг юм.
□   Таны анхаарлаа төвлөрүүлж удаан суухад тань сууж буй сандал нөлөөтэйг хэлэх хэрэгтэй. Өөртөө эвтэйхэн, удаан суухад боломжийн сандал сонгоорой.
□   Суралцах таатай орчин гэдэг нь басхүү тохирсон дулаантай газар байхыг ойлгоно. Хэрвээ та хүйтэн, эсвэл хэт халуун орчинд байвал сурахад хүндрэлтэй байх нь мэдээж.
□   Түүнчлэн зөв байрлалтай, нүдээ онийлгохгүйгээр харах гэрэлтүүлэгтэй орчин хэнд ч хэрэгтэй. Гэрэлтүүлэг муу газар тухгүй байдгаас гадна сурах идэвх буурч улмаар толгой өвдөх аюултай.

Суралцах таатай орчноо зөв сонгоно гэдэг сайн суралцахын эхний алхам юм шүү.

Амжилт хүсье.

11-р сард Хятадын гадаад худалдааны импорт экспорт нэмэгдсэн байна

Elrond — Sat, 12 Dec 2009 02:25:15 GMT

11-р сард Хятадын гадаад худалдааны импорт экспортын нийт хэмжээ 208 тэрбум 200 сая ам долларт хүрч өнгөрсөн оны мөн үеийнхээс 9.8% нэмэгдэн, импорт экспортын нийт хэмжээ анх удаагаа сарын хэмжээ өнгөрсөн оны мөн үеийнхээс нэмэгдсэн байна.

Хятадын Гаалийн бүртгэлээр, Хятадын гадаад худалдаа илт сайжирч, 11-р сард экспортын нийт хэмжээ 113 тэрбум 650 сая ам долларт хүрч өнгөрсөн сарынхаас 2.6% нэмэгджээ. Импорт 94 тэрбум 560 сая ам долларт хүрч өнгөрсөн сарынхаас 9% нэмэгджээ.

1-гээс 11-р саруудад Хятадын гадаад худалдааны импорт экспортын нийт хэмжээ 1 триллион 964 тэрбум ам долларт хүрч өнгөрсөн оны мөн үеийнхээс 17.5% буурчээ. Худалдааны ашиг 177 тэрбум 900 сая ам долларт хүрч, өнгөрсөн оны мөн үеийнхээс 30.6% буурсныг бүртгэл харуулжээ.

1-гээс 11-р сард Хятадын худалдааны гурван том түнш Европын холбоо, АНУ болон Япон болсон байна.

Монгол Орос Хятад 3-н орны олон улсын мисс шалгаруулах тэмцээн Манжуурт болно

Elrond — Sat, 12 Dec 2009 02:10:31 GMT

Монгол, Орос, Хятад 3 орны олон улсын мисс шалгаруулах 6 дахь тэмцээн 12-р сарын 22—26-ны өдрүүдэд Хятад-Оросын хилийн хамгийн том боомт хот--Өвөр Монголын Манжуур хотноо болно.

Оросын Чита, Иркутск, Монгол улсын Улаанбаатар болон Хятад улсын нийт 74 хүн тэмцээнд оролцоно. Үүнд Хятад улсаас 20, Оросоос 36, Монгол улсаас 18 хүн тус тус оролцох юм байна.

Хятад, Орос, Монгол 3 орны тэмцээнд оролцогчид Манжуур хотноо хүрэлцэн ирж хагас шувтаргын тэмцээнд оролцох гэж байна. Шувтаргын тэмцээн 23-ны орой болно.

Хятад улс A төрлийн H1N1 вакцин тарих ахицаа түргэтгэнэ

Elrond — Sat, 12 Dec 2009 01:44:25 GMT

Хятадын "А" төрлийн Н1N1 томууны вирусээс сэргийлэх вакцины аюулгүй гэдгийг их цар хэмжээнд хийсэн практик үйл ажиллагаа гэрчилж байна гэж Хятадын Эрүүл Мэндийн Яам 11-ний өдөр мэдэгдсэн байна. Хятадын Эрүүл Мэндийн Яам "А" төрлийн Н1N1 томууны вирусээс сэргийлэх вакцин тарих ахицаа түргэтгэж,тарих хүмүүсийн хүрээг өргөтгөж, энэ өвөл, ирэх хавар уг өвчнөөс сэргийлэхэд вакцины гүйцэтгэх үүргийг хамгийн их хэмжээгээр эрчимжүүлэх болно.

Хятадын Эрүүл Мэндийн Яамны хийсэн бүртгэлээр, 12-р сарын 9-ний өдөр хүртлэх байдлаар, Хятадад 32 сая 380 мянган хүнд вакцин тарьжээ. Сүүлийн хугацаанд, олон газрын вакцин тарих ахиц удааширч байна. Энэ нь нэг талаар вакцин үйлдвэрлэх хүчин чадал хязгаартай байгаагаас, нөгөө талаар иргэд вакцин тарихын аюулгүйн чанарт сэтгэл түгшиж байгаагаас болсон юм.

Үүнд холбогдуулан, Хятадын Эрүүл Мэндийн Яамны хэвлэлийн төлөөлөгч Дэн Хайхуа хэлэхдээ: өнөө, бүх Хятадад урьдчилан сэргийлэх вакцин тариад хэвийн бус байдалтай гэж сэжиглэгдсэн 3600 гаруй тохиолдлоос 70 гаруй хувь нь халуурах, хэсэг газар улайж хавдах зэрэг байдал илэрчээ. Энэ нь Дэлхийн Эрүүл Мэндийн Байгууллагын нийтэлсэн, дэлхийн "А" төрлийн Н1N1 томууны вирусээс сэргийлэх вакцин тарихын аюулгүйн чанарт хийсэн үнэлгээний дүгнэлттэй бараг адил байгаа. "А" төрлийн Н1N1 томууны вирусээс сэргийлэх вакцин аюулгүй гэдгийг энэ нь харуулж байна гэлээ.

"Зарим бүс нутаг болон тусгай тогтоосон хүмүүст вакцин тарьснаас хойш, маш тодорхой хамгаалалтын үр ашиг гарч, томууны дэлгэрэлтийг үр ашигтай тогтоон барьсан байна. 'А' төрлийн Н1N1 томууны вирусээс сэргийлэх вакцин аюулгүй гэдгийг Хятадад өргөн цар хэмжээнд вакцин тарьсан ажлын практик үйл ажиллагаа гэрчиллээ. Хэвийн бус урвал гарах явцад, хэвийн бус ноцтой урвал гарах хэмжээ бараг 1 саяны 1 хувьд байгаа болохоор, энэ нь Хятадын ба гадаадын 'А' төрлийн Н1N1 томууны вирусээс сэргийлэх вакцины эмчилгээний туршилт болон их цар хэмжээгээр вакцин тарьснаас хойш, хэвийн бус урвалд хяналт шалгалт хийсэн дүнгийн хэмжээнээс даваагүй" гэжээ.

Хятадын Эрүүл Мэндийн Яамны эрүүл хамгааллын шуурхай мэдээлэлийн албаны дарга Лян Ваньнянь хэлэхдээ:

"Бид вакцины аюулгүйн чанар болон үр ашигтай чанарын талаарх ухуулгаа цаашид эрчимжүүлж, эмнэлгийн ажилтнууд вакцин тарихад цээрлэдэг зүйлийг улам сайн эзэмшиж, нааштай зохион байгуулж дайчилбал, вакцины тарилгыг үргэлжлүүлэх итгэл зориг бидэнд байгаа юм. Энэ бол олон улсын нийтлэг ойлголт. Бид хэрвээ ажлаа түргэтгэхгүй юм бол, үр ашигтай сэргийлэн хамгаалалтын боломж тохиолыг алдах болно. Вакцин тарих ахицыг улам түргэтгэж, өдөрт 1 сая 500 мянган хүнийг вакцинжуулахыг хүсэж байна. Ингэвэл сар шинээс өмнө 'А' төрлийн Н1N1 томууны вирусийн халдвар их дэлгэрэхээс өмнө нь гол хамгаалах хүмүүст үр ашигтай дархал үүсэхийг хүсэж байна гэжээ.

Үүний зэрэгцээ, Эрүүл Мэндийн Яам бас вакцин тарих гол хүрээнд жирэмсэн эмэгтэй, малын эмч, гэрийн тэжээвэр шувуу, мал болон хээрийн амьтдыг тэжээдэг хүмүүсийг хамруулсан байна.