Хятадын талаархи мэдээллийг эндээс

     Энэ сарын 12-14-ний өдрүүдэд Хятадын улсын Дарга Хү Жиньтао Казахстан, Туркменстанд ажлын айлчлал хийнэ. Хятад улсын дээд удирдагчийн энэ оны сүүлчээр Төв Азийн орнуудад хийх айлчлал нь талуудын анхаарлыг татаж байна. Хятадын ГХЯ-ны орлогч сайд Ван Гуан-я 10-ны өдөр үүнд холбогдуулан сэтгүүлчид ярилцлага өгөхдөө, энэ айлчлалаар дамжуулан, Казахстан, Туркменстан хоёр оронтой улс төрийн итгэлцэл болон ажил хэрэгч хамтын ажиллагаагаа цаашид эрчимжүүлж, Төв Азийн бүс нутгийн эв зохицонгуй хөгжилд хув нэмэр оруулахыг Хятад улс хүсэж байна гэж тэмдэглэжээ.

     Хү Жиньтао Казахстаны Ерөнхийлөгч, Туркменстаны Ерөнхийлөгч нартай тус тус хэлэлцээ хийж, Хятад болон Казахстан, Хятад болон Туркменстаны харилцаа, хамтаар сонирхож байгаа бүс нутаг, олон улсын асуудлаар санал бодлоо солилцоно. Сүүлийн жилүүдийн Хятад болон Казахстан, Хятад болон Туркменстаны харилцааны хөгжлийг Ван Гуан-я нааштай үнэллээ.

     "1992 оны 1-р сард Хятад, Казахстан дипломат харилцаа тогтоосноос хойш, хоёр талын хамтын хүчин чармайлт дор, хоёр тал сайн хөршийн найрамдал, харилцан ашигтай хамтын ажиллагааны зарчмыг хатуу баримталж, уламжлалт найрамдлаа гүнзгийрүүлж, ажил хэрэгч хамтын ажиллагаагаа өргөжүүллээ. Үүний зэрэгцээ, сүүлийн жилүүдэд Хятад болон Туркменстаны харилцаа урагштай хөгжиж, хоёр орны улс төр, эдийн засаг, худалдаа, эрчим хүч, зам харилцаа, нийгэм, соёл зэрэг салбарууд дахь хамтын ажиллагаа байнга өргөжин тэлж, хүмүүсийн сэтгэлийг баярлуулам ололт амжилтад хүрлээ" гэж Ван Гуан-я тэмдэглэлээ.

     Тэрээр хэлэхдээ: сүүлийн жилүүдэд, Хятадын удирдагчид Казахстан, Туркменстан хоёр орны дээд давхарга хоорондын хэлхээ холбоо олширч, улс төрийн итгэлцэл байнга гүнзгийрснээр, хоёр талын эдийн засаг, худалдаа зэрэг салбарын хамтын ажиллагаа цаашид өргөжихөд нөхцөл боломж хангалаа гэжээ. Хятад болон Казахстан, Хятад болон Туркменстаны харилцааны хөгжил нь хоёр талын хамтын ашиг сонирхолд нийцэх бөгөөд хөгжлийн өргөн уудам хэтийн төлөвтэй юм гэж тэрээр онцолжээ.

     Ван Гуан-ягийн хэлснээр, Туркменстанд айлчлах хугацаандаа Дарга Хү Жиньтао урилгаар Казахстан, Туркменстан, Узбекстан 3 орны төрийн тэргүүн нартай хамтаар, Хятад-Төв Азийн байгалийн хийн хоолой нэвтрүүлэх ёслолд оролцоно.

     Дарга Хү Жиньтао Төв Азийн орнуудад энэ удаа гуравхан хоног айлчлах боловч, энэ нь Казахстан, Туркменстан хоёр оронтой харилцаагаа хөгжүүлэхийг Хятад улс чухалд үзэж байгааг харуулж байна. Дарга Хү Жиньтао энэ хоёр оронд анх удаа айлчилах гэж байгаа биш гэдгийг гадаадынхан ч анхааралдаа авлаа.

     "Хятад улс болон Төв Азийн орнуудтай газар зүйн талаар хөршилж, соёлын талаар холбоотой, гүн зузаан уламжлалт найрамдалтай, хүн ард нь нягт холбоотой байдаг. Хятад улс болон Төв Азийн орнуудын сайн хөршийн хамтын ажиллагааны найрсаг харилцааг байнга бэхжүүлэн хөгжүүлэх нь Хятадын Засгийн газрын ямагтын чиг шугам болно, энэ нь Хятад улс болон Төв Азийн улс түмний хамтын ашиг сонирхолд ч нийцэх юм. Бие биеэ хүндэтгэх, эрх тэгш, харилцан ашигтай байх зарчмыг мөрдөн журамлаж, Төв Азийн улс түмэнтэй олон салбарт ажил хэрэгч хамтын ажиллагаа өрнүүлж, энх тайван, хөгжсөн, эв зохицонгуй бүс нутаг байгуулахын тулд цуцалтгүй хүчин чармайлт гаргахад бид бэлэн байна гэж Ван Гуан-я тэмдэглэжээ.